Markaziy va Janubiy Osiyo, yaqin Sharq, Yevropa va Xitoy davlatlari uchun ko‘prik vazifasini bajaradi

Bugun “Markaziy va Janubiy Osiyo: mintaqaviy sheriklik” mavzuyidagi xalqaro konferensiya o‘z ishini boshladi. “Muammolar va imkoniyatlar”.

Tadbirda O‘zbekiston va xorijiy mamlakatlarning vazirlik va idoralari delegatsiyalari, dunyoning 44 ta mamlakatidan 180 dan ortiq ishbilarmon va ekspert doira vakillari, shuningdek, xalqaro tashkilotlar va moliya institutlarining 29 nafar rahbarlari ishtirok etmoqda.

Konferensiya doirasida O‘zbekiston Prezidenti Shavkat Mirziyoyev, Afg‘oniston va Pokiston davlat va hukumat rahbarlari, BMT bosh kotibi Antoniu Guterrish, tashqi ishlar vazirlari, xalqaro tashkilotlar va moliya institutlari rahbarlari ishtirokida yalpi Majlis bo‘lib o‘tdi.

Shavkat Mirziyoyev o‘zining qutlov nutqida Markaziy va Janubiy Osiyo xalqlari o‘rtasidagi umumiy tarix va yaqin munosabatlarni qayd etdi.

"Buyuk ipak yo‘li chorrahasida joylashgan Markaziy va Janubiy Osiyo uzoq asrlar davomida xalqlar va sivilizatsiyalar o‘rtasida faol muloqotga xizmat qildi.

Ikki mintaqaning o‘zaro yaqin hamkorligi natijasida yangi bilim va falsafiy qarashlar, tibbiyot va astronomiya, jo‘g‘rofiya va matematika, geodeziya va me’morchilik, diplomatiya san’ati va davlat boshqaruvi sohasidagi yutuqlar, yuksak madaniy va ma’naviy-ma’rifiy qadriyatlar keng yoyildi.

Mintaqalarimiz xalqlari bir necha bor umumiy davlatchilik tuzilmalari tarkibida, shu bilan birga, siyosiy, iqtisodiy va gumanitar makonda o‘zaro hamjihatlikda umr kechirganlar.

Ushbu hududda vujudga kelgan Xarappa sivilizatsiyasi, Yunon-Baqtriya va Kushon podshohligi, Turk xoqonligi, Xuroson va Movarounnahr, G‘aznaviylar, Temuriylar, Boburiylar va boshqa davlatlar insoniyat tarixida chuqur iz qoldirgan.

Markaziy va Janubiy Osiyo azaldan ishonchli savdo yo‘llari bilan bog‘lanib, Yaqin Sharq, Yevropa va Xitoy mamlakatlari uchun o‘ziga xos ko‘prik vazifasini o‘tagan.

Bu haqda qadimgi yunon tarixchisi Strabon ham o‘z asarlarida Oks daryosi – hozirgi Amudaryo bo‘ylab “Kaspiy va Qora dengiz orqali Yevropaga mahsulotlar yetkazilgan”ini qayd etgan.

Eramizdan avvalgi uchinchi-ikkinchi ming yilliklardayoq Haybar va Bolan dovonlari orqali o‘tgan savdo yo‘llari tarmog‘i bizlarni o‘zaro bog‘lab turgan.

Markaziy va Janubiy Osiyoda islom, buddaviylik, hinduiylik dinlari va turli xalqlarning noyob an’analari tarqalishi tufayli buyuk etnomadaniy mushtaraklik qaror topgan, Sharqning boy va rang-barang madaniyati shakllangan", - dedi prezident

Izoh qoldirish

Fikr qoldirish uchun siz ijtimoiy tarmoqlar orqali kirishingiz kerak:


Tizimga kirish orqali siz qayta ishlashga rozilik bildirasiz Shaxsiy malumot