Xivadagi Islomxo‘ja minorasi

O‘zbekistondagi eng baland minoralardan biri Ichanqal’a markazida qad rostlab turibdi. Bu Islomxo‘ja minorasidir. Minora madrasa va masjidni o‘z ichiga olgan shu nomdagi majmuaning bir qismi hisoblanadi. Minoraning balandligi 56,6 metr bo‘lib, Markaziy Osiyoda ikkinchi o‘rinda turadi. Balandligi bo‘yicha Ko‘hna Urganchdagi Qutlug‘ Temur minorasi (balandligi 62 metr) birinchi, Toshkentdagi Hastimom minorasi (balandligi 53 metr) uchinchi o‘rinda turadi. Minora qurilishi 1908-yilda Xiva xonlari Muhammad Rahimxon va Asfandiyorxonning bosh vaziri Islomxo‘janing tashabbusi bilan boshlangan. 

Qurilishda Oʻrta Osiyo bo‘yicha oʻsha davrning eng yaxshi meʼmorlari, jumladan, Xudoybergan Xoji, mashhur naqqoshlar Eshmuhammad Xudoyberdiyev va Bolta Voisovlar ishtirok etgan. Minoraning diametri poydevorda 9,5 metr bo‘lib, an’anaga ko‘ra tepaga qarab torayib boradi. Minoraga pastdan yuqoriga tomon qarasangiz, bu inshootning ulug‘vorligini his qilasiz. Yuqoridan minora jimjimador karniz bilan bezatilgan bo‘lib, jarchining xonasi ustidagi kichik gumbazli chiroq bilan yoritilgan. Minora asosini pishgan gʻisht tashkil etadi. G‘isht taxlami sirlangan mayolika qoplangan g‘ishtlar bilan birgalikda yotqizilgan. 

Minora ichida pishgan g‘ishtdan yasalgan aylanma zinapoya bo‘ylab harakat qilish mumkin. Zinapoya bo‘ylab 175 qadam bosgach, asosiy ko‘shkka yetib borish mumkin. Bu yerdan shaharning betakror manzarasi namoyon bo‘ladi. Ilgari minora kuzatuv va musulmonlarni namozga chaqirish (azon aytish) joyi sifatida ishlatilgan. Bugungi kunda minoraning vazifalari deyarli o‘zgarmagan. Kuzatuv maydonchasiga ko‘tarilib, shaharning ajoyib manzaralarini tomosha qilish va namoz vaqtida azon aytayotgan muazzinning ovozini eshitish mumkin. Ajoyib Islomxo‘ja minorasi YUNESKOning Butunjahon merosi obyektlari Reprezentativ ro‘yxatiga kiritilgan.

Izoh qoldirish

Fikr qoldirish uchun siz ijtimoiy tarmoqlar orqali kirishingiz kerak:


Tizimga kirish orqali siz qayta ishlashga rozilik bildirasiz Shaxsiy malumot