Yulduzlar va kvazarlarni qidirib. Maydanak baland tog‘ observatoriyasi

Shahrisabz shahridan 45 km. uzoqlikda Qashqadaryo viloyatining Kamashi tumanida Markaziy Osiyodagi eng katta bo‘lgan bir yarim metrlik teleskop o‘rnatilgan Maydanak astronomik observatoriyasi joylashgan. Observatoriya 1970 yilda ochilgan. Hozirgi kunda bu eng zamonaviy uskunalar bilan to‘liq jihozlangan stansiya hisoblanadi. Observatoriya Mirzo Ulug‘bek nomidagi Astronomiya institutiga tegishli bo‘lib, xorijiy olimlar bilan birgalikda astronomiyani o‘rganish borasida hamkorlik qilib kelmoqda.

Observatoriya 2650 metr balandlikda Hisor tog‘ massivining ustida joylashgan. Noyob geografik joylashuvi, ideal iqlim sharoiti va kuchli teleskop astronomik observatoriyaga o‘zgaruvchan yulduzlar va galaktikalarning harakatini aniq kuzatish, samoviy jismlarning to‘dalarini o‘rganish hamda kvazar va o‘ta yangi yulduzlarning o‘zgarishini kuzatish imkonini beradi.

Shimoliy yarim sharning eng yaxshi observatoriyasi sifatida bu yerda 80 dan ortiq asteroid, to‘rtta kometa va yangi kichik sayyora kashf etilgan. Kichik sayyora “Samarqand” deb nomlangan va Kichik sayyoralarning xalqaro katalogiga kiritilgan. U o‘zbek astronomlari tomonidan 2010 yilning iyul oyida kashf etilgan. Maʼlum bo‘lishicha, kichik sayyora Quyosh atrofida Mars va Yupiter orbitalari o‘rtasida taxminan to‘rt yil davriylik bilan aylanib yuradi.

Observatoriya uchun ulkan hudud - taxminan 40 gektar maydon ajratilgan. Tog‘larning bepoyon kengliklarida osmon ayniqsa past, yulduzlar esa juda yaqin tuyuladi. Bu yerda dengiz hayvonlarining qoldiqlari, qadimgi uxlab yotgan vulqonni ko‘rish mumkin, havoning tozaligi va ajoyib manzara esa odamni maftun etadi.

Xarita

Izoh qoldirish

Fikr qoldirish uchun siz ijtimoiy tarmoqlar orqali kirishingiz kerak:


Tizimga kirish orqali siz qayta ishlashga rozilik bildirasiz Shaxsiy malumot