Miroqi turizm mahallasi

Miroqi mahallasi Shahrisabz shahridan 30 km uzoqlikda, Hisor tog‘ tizmalari etagida, dengiz sathidan 1000 metr balandlikda joylashgan. Qulay iqlim sharoiti va shifobaxsh tog‘ havosi Miroqiga ko‘plab tashrif buyuruvchilarni jalb etadi. Bu yerda bahorda lolalar va gulsapsarlar ochiladi, yozda esa dalalar oltin boshoqlarga burkanadi. Qishloq aholisi o‘z an’analari bilan faxrlanib, ularni mehmonlar bilan baham ko‘radi va sayyohlarni o‘zbek madaniy muhiti bilan tanishtiradi. Ushbu mahallaga tashrif buyurganda, balandligi 4083 metrga yetadigan Hazrat Sulton tog‘ cho‘qqisiga sayohat qilish mumkin. Shuningdek, Miroqi mahallasi yaqinida dengiz sathidan 2100 metr balandlikda joylashgan, balandligi 84 metr bo‘lgan Suvtushar sharsharasi mavjud.

Miroqi yaqinda “turizm mahallasi” maqomini olgan bo‘lsa-da, uning hududida sayyohlarning qulay yashashi uchun 120 dan ortiq mehmon uylari faoliyat ko‘rsatmoqda. Mehmon uylariga muqobil variant sifatida mahallada 19 ta mehmonxona ham mavjud. Sayyohlik marshrutiga faol dam olish va tabiat qo‘ynida maroqli vaqt o‘tkazish imkonini beruvchi 30 dan ortiq tabiiy obyektlar kiritilgan. Miroqi mahallasi yaqinida, Hisorak suv ombori atrofida, kuzatish maydonchasi tashkil etilib, Qashqadaryo viloyatining go‘zal manzaralaridan bahramand bo‘lish imkonini beruvchi dor yo‘li ishga tushirilgan. Ushbu qishloqda tashrif buyuruvchilar uchun turli xil dam olish imkoniyatlari mavjud. Davolanishga muhtoj bo‘lgan mehmonlar “Miroqi” sanatoriysida dam olib, sog‘liqlarini tiklashlari mumkin. Shuningdek, mahalladagi yosh mehmonlarga “Lochin” oromgohida dam olish taklif etiladi, u yerda ular tengdoshlari davrasida vaqt o‘tkazadilar.