“Xiva – Islom dunyosining turizm shahri” shiori ostida xalqaro tadbiri bo‘lib o‘tdi

123

Joriy yilning 5-mart kuni Xiva shahrining Ichan-qal’a majmuasida “Xiva – Islom dunyosining turizm shahri” shiori ostida xalqaro tadbir bo‘lib o‘tdi.

Tadbirda Islom hamkorlik tashkilotining kotibiyati, ekspertlari va uning tarkibidagi tashkilotlar, Тurizm qo‘mitasi va Xorazm viloyati hokimligi rasmiylari hamda ommaviy axborot vositalari vakillari ishtirok etdi.

Ma’lumot uchun: 2022-yil 27-29-iyun kunlari Ozarbayjon Respublikasining Boku shahrida bo‘lib o‘tgan Islom hamkorlik tashkilotiga (IHT) a'zo davlatlar turizm vazirlarining XI sessiyasida Xiva shahriga 2024-yilda “Islom dunyosining turizm shahri” maqomi berilgan edi.

Sessiyada O‘zbekiston delegasiyasi rahbari - Ekologiya, atrof-muhitni muhofaza qilish va iqlim o‘zgarishi vaziri Aziz Abduhakimov tomonidan o‘tkazilgan taqdimotda O‘zbekiston Respublikasi Prezidenti tomonidan turizm sohasida yuritilayotgan ochiqlik siyosati, viza rejimining soddalashtirilishi, madaniy merosni saqlash, tarixiy shaharlarni obodonlashtirish kabi islohotlar hamda Xiva shahrining tarixi, madaniyati va turizm salohiyatiga alohida e'tibor qaratildi.

Bu e'tirofi – ichki va tashqi turizmni rivojlantirish, yangi infratuzilma obyektlari, muzey va ekspozitsiyalar barpo etish, sayyohlik xizmatlari eksporti hajmini oshirish imkonini bermoqda.

“Xivaga Islom hamkorlik tashkiloti tomonidan Islom dunyosining turizm shahri maqomining berilishi xalqaro turizm bozorida Xivani turistik destinasiya sifatida yanada tanilishiga imkoniyat yaratadi, – dedi Turizm qo‘mitasi raisining birinchi o‘rinbosari Jamshid Abdusalomov.

Markaziy Osiyodagi eng diqqatga sazovor shaharlardan biri Xiva, mintaqada butunligicha saqlanib qolgan yagona nodir obida-shahardir. U oʻzining qadimiy obidalari bilan mashhur boʻlib, dunyoning barcha burchaklaridan sayyohlarni oʻziga tortadi. Xiva shahri 1990-yil 12-dekabrda UNESCOning Kanadada bo‘lib o‘tgan XIV sessiyasining maxsus qarori bilan O‘rta Osiyoda birinchi bo‘lib “Butun jahon merosi” sifatida ro‘yхatga olingan.

“Ma’lumki, Xiva o‘tmishda madaniyat va ilm markazi sifatida ta'n olingan, - deb ta'kidladi Islom hamkorlik tashkiloti bosh kotib o‘rinbosari Ahmad Kawesa Sangendo.

Islom hamkorlik tashkiloti bosh kotib o‘rinbosari Ahmad Kawesa Sangendo tomonidan Xivaga 2024-yilda “Islom dunyosining turizm shahri” maqomi berilganligi munosabati bilan Xiva tuman hokimiga sertifikat topshirildi.