Shopping turizmi

O‘zbek xalqining madaniyati va hayoti bilan yaqindan tanishish uchun albatta mahalliy bozorga boring. Bozor - bu butun xalqning barcha qatlamlari yig‘iladigan o‘ziga xos alohida olam. Bu yerda siz nafaqat esdalik sovg‘alari, mevalar, sabzavotlar, shirinliklar, ziravorlar, non, oziq-ovqat kabi turli xil tovarlarning ko‘pligidan, balki odamlar bilan muloqot qilish va biron bir savdo markazi yoki mahalliy gipermarketda uchramaydigan o‘ziga xos, samimiy muhitdan ham bahramand bo‘lishingiz mumkin. Agar siz esdalik sovg‘alari va suvenirlarni xarid qilmoqchi bo‘lsangiz, albatta Toshkentdagi Chorsu bozori, Samarqanddagi Siyob bozori yoki Buxorodagi Toqi Zargaronga tashrif buyuring.

Suvenirlarning ko‘pligi O‘zbekiston shaharlariga tashrif buyurgan ko‘plab sayyohlarni ba’zan katta zavq va hatto madaniy shok holatiga soladi. Qo‘lda tayyorlangan mahsulotlardan tortib fabrikada tayyorlangan mahsulotlargacha, bu mahsulotlarning barchasi qalb qo‘ri bilan yaratilgan va shuning uchun o‘ziga xos joziba va nafosatga ega. Har bir shaharda hunarmandlar har qanday did va mablag‘ga mos bo‘lgan betakror esdalik sovg‘alarini yaratadilar.

Agar siz Toshkentda bo‘lsangiz, “Chorsu” bozoridan barcha turdagi suvenirlarni xarid qilishingiz mumkin – bu yerda bozor hududidagi butun bir majmua faqat milliy hunarmandchilik mahsulotlari va suvenirlar uchun ajratilgan.

Buxorodagi suvenirlarni Eski shahar do‘konlaridan, xususan, Buxoroning mashhur Savdo gumbazlaridan xarid qilish mumkin. Xivada, shuningdek, tarixiy markaz hududida, Ichanqal’a devorlari yaqinida ajoyib suvenirlarni xarid qilishingiz mumkin. Agar siz Samarqandda tejamkor variantni tanlasangiz, ularni markazdan uzoqroqdagi kichik do‘konlardan yoki bozorlardan qidirgan ma’qul. Masalan, “Siyob” bozoridan uzoq vaqt qotib qolmaydigan mazali non va turli shirinliklar xarid qilishingiz mumkin. Shuningdek, Registon maydoni atrofidagi do‘konlarga tashrif buyurib, bir nechta ajoyib suvenirlar xarid qilishingiz mumkin.

Xalq amaliy sanʼati ustaxonalari Oʻzbekistonning haqiqiy xazinalaridir. O‘zbekistonda azaldan xalq amaliy san’atining noyob an’analarini asrab-avaylab, avloddan-avlodga o‘tkazib kelayotgan beqiyos iste’dod sohiblari yashab kelgan. Nafis kulolchilik, yog‘ochdan yasalgan buyumlar, tovlanuvchi ipak, qo‘lda ishlangan gilamlar, rang-barang so‘zanalar, zargarlik buyumlari - bu xalq san’ati durdonalari o‘z tashrif buyuruvchilariga taklif qilishi mumkin bo‘lgan narsalarning to‘liq ro‘yxati emas. O‘nlab yillar davomida faoliyat ko‘rsatib kelayotgan ko‘plab ustaxonalar o‘z maktablariga ega bo‘lib, ular o‘zlarining noyob mahorat sirlarini avlodlarga yetkazib kelmoqda. Qadimgi madrasa va masjidlar hududida ko‘plab ustaxonalar, masalan, ganch va yog‘och o‘ymakorligi ustaxonalari faoliyat yuritadi. Bu yerda qadimiy me’morchilik yodgorliklarini ta’mirlash maktablari ham mavjud.

Masalan, Toshkentga kelgach, Hazrati Imom majmuasi yoki qadimiy Ko‘kaldosh madrasasi hududida joylashgan noyob ustaxonalar va hunarmandlarning do‘konlariga tashrif buyurishingiz mumkin. Shuningdek, Rishton (Farg‘ona) va G‘ijduvon (Buxoro)dagi Kulolchilik markazi yoki Farg‘ona viloyatidagi Marg‘ilon “Yodgorlik” ipak fabrikasini kelib ko‘rishingiz mumkin.