“Gulbozor” mahallasi turizm ko‘chasi

O‘zbekiston boy tarix va merosga ega bo‘lgani holda, sayohatchilarga o‘zbek xalqining hayoti va an’analari bilan tanishish uchun ajoyib sayyohlik yo‘nalishlarini taklif etadi. Madaniy qadriyatlarni asrab-avaylash va yetkazish maqsadida Toshkent shahridagi ko‘chalardan biri – “Gulbozor” mahallasi sayyohlik makoniga aylantirildi. Ko‘cha shaharning tarixiy qismida joylashgan bo‘lib, o‘ziga xos xususiyatlari, bebaho madaniy merosi bilan sayyohlar e’tiborini tortadigan noyob maskan hisoblanadi. Chorsu bozori va 1570-yilda qurilgan mashhur Ko‘kaldosh madrasasining yaqinligi ushbu sayyohlik ko‘chasini O‘zbekiston tarixi va madaniyati bilan yaqindan tanishishni istagan sayyohlar uchun yanada jozibali qiladi.

Qayta ta’mirlash jarayonida turizm ko‘chasiga kiraverishda o‘rta asrlar an’anaviy uslubida qurilgan darvoza qayta tiklandi. Xoja Ahror Valiy masjidining ajoyib manzarasini taqdim etuvchi o‘ymakor ustunli 50 metrlik ayvonni alohida ta’kidlab o‘tish lozim. E’tiborli jihati shundaki, ko‘chada hovuz barpo etilgan bo‘lib, u issiq kunlarda salqinlik va tetiklik bag‘ishlaydi. Shuningdek, ko‘kalamzorlashtirish maqsadida ko‘cha bo‘ylab gullar, mevali va manzarali daraxtlar ekilgan.

Bu ko‘cha tor ko‘chalari, pastak uylari, yog‘ochdan yasalgan o‘ymakor eshiklari bilan o‘zbek mahallasining o‘ziga xos qiyofasini saqlab qolgan bo‘lsa-da, ayni paytda yangicha vazifa kasb etgan holda, madaniyat va hunarmandchilik ustaxonalari markaziga aylandi. Ko‘cha bo‘ylab nafaqat hunarmandlarning ish joyini tomosha qilish va sevimli buyumlarni xarid qilish mumkin bo‘lgan hunarmandchilik ustaxonalari, balki o‘zbek milliy taomlarining boy tanlovini taklif qiluvchi shinam novvoyxonalar va restoranlar ham paydo bo‘ldi. Yangi yopilgan nonning xushbo‘y isi ziravorlar ifori bilan qo‘shilib, haqiqiy sharqona mehmondo‘stlik muhitini yaratadi. Sayyohlarga o‘zbek xalqining tarixi va madaniy qadriyatlarini o‘zlashtirish maqsadida mazkur ko‘cha hududida tashkil etilgan “Non tarixi” va “Qadimiy Toshkentga sayohat” ko‘rgazmalariga tashrif buyurish imkoniyati yaratilmoqda.

“Gulbozor” mahallasida joylashgan “Mulberry hotel” mehmonxonasi jozibador turar joy obyektlaridan biri sifatida o‘zini namoyon qila oldi. Mehmonxona yuqori darajadagi qulaylik va sifatli xizmat ko‘rsatishdan tashqari, qiziqarli dizayn yechimlari bilan ham e’tiborni tortadi. Mehmonxona qurilishi davomida egalari tomonidan uning hududida o‘sgan ming yillik tut daraxti saqlab qolingan. Noyob daraxt bino dizayni bilan birlashtirilib, interyerning bir qismiga aylangan, bu esa mehmonxonaga o‘zgacha joziba va betakrorlik baxsh etadi.

“Gulbozor” mahallasidagi sayyohlar ko‘chasi o‘zbek madaniyati pardasini ko‘tarib, O‘zbekiston milliy muhitidan bahra olish uchun ajoyib imkoniyatdir. Shaharning bu gavjum go‘shasida har bir mehmon Sharqning chinakam ruhini va mahalliy merosning go‘zalligini his qiladi.

Izoh qoldirish

Fikr qoldirish uchun siz ijtimoiy tarmoqlar orqali kirishingiz kerak:


Tizimga kirish orqali siz qayta ishlashga rozilik bildirasiz Shaxsiy malumot